«La nestre associazion e je prime di dut une comunitât di personis che, in plene libertât, si dà dongje par tignî sù i valôrs de nestre int, i valôrs ch’a componin l’ereditât storiche, culturâl e spirituâl dal popul furlan, un popul, fi di Aquilee, fradi di chei altris popui d’Europe.
Cheste e je la mission che cumò cent agns, te citât di Gurize, i furlans a àn decidût di dâsi, fondant la Societât Filologjiche, cheste e je la mission che nô o cirìn di puartâ indenant miôr ch’o podìn e simpri cheste e je la mission ch’o vin di infidâ ai furlans di doman».
In zonte o publichìn par intîr il discors che il President de Societât Filologjiche Furlane, prof. Federico Vicario, al à fat te dì dal congrès dal Centenari, domenie ai 6 di Otubar dal 2019 tal Centri culturâl des Graciis a Udin.