«Il Congrès di Flumisel La Vila al è impuartant no dome par dâ continuitât ae nestre riflession sui cent agns di culture furlane, ch’o vin fat celebrant la fondazion dal Istitût. Al è impuartant ancje parcè che si trate dal prin Congrès dopo cheste pandemie dal coronavirus che, magari cussì no, no vûl passâ. La situazion ch’o vin vivût e che, in part, o continuìn a vivi e à puartât une fuarte limitazion dai contats umans e des relazions tra lis personis. Si trate di modificâ – no par sielte, ma par sante scugne – la nestre disposizion a comunicâ, passant a formis gnovis. Cemût vino rispuindût duncje, come Societât Filologjiche Furlane, a cheste situazion? Intune peraule “cul cjâf”».
Tal download in cheste pagjine si pues discjamâ par intîr il discors che il President de Societât Filologjiche Furlane, prof. Federico Vicario, al à fat pal XCVII Congrès sociâl, domenie ai 4 di Otubar dal 2020 a Flumisel La Vila.