Domenie ai 15 di Otubar dal 2023 si è davuelt il Congrès numar 100 inte storie de Societât Filologjiche Furlane. Pe prime volte i socis e i amîs dal Sodalizi si son dâts dongje a Montreâl, te pedemontane dal Friûl di soreli a mont.
La zornade si è vierte cu la Messe in domo e lis voris si son tignudis tal auditorium de ex Centrâl di Malnîs.
Il sindic di Montreâl Igor Alzetta al à dât il benvignût di bande de comunitât e l'ospit d'onôr al è stât il storic Carlo Ginzburg, autôr dai studis sul Menocchio, il mulinâr eretic brusât vîf de Incuisizion dal Cinccent. E je stade la ocasion par ringraciâ il mestri Aldo Colonnello, anime dal Circul culturâl Menocchio, par dut ce che al à fat a pro de culture furlane in chescj agns.
Une vore interessant al è stât ancje l'intervent di Francesco Chinellato su la centrâl idroeletriche di Malnîs.
Tancj i sorestants che a àn volût jessi presints o mandâ il lôr salût par cheste ocasion cussì impuartante.
Al è stât presentât il Numar Unic "Montreâl", par cure di Aldo Colonnello, Alessandro Fadelli e Paolo Tomasella e a son stadis lis premiazions de XXI edizion dal Premi "Andreina e Luigi Ciceri".
Te sezion download in cheste pagjine si pues discjamâ e lei il discors dal President de Societât Filologjiche Furlane Federico Vicario.