Dizionari storic furlan di podê consultâ in rêt 

Cun vuê si pues consultâ in rêt ae direzion www.dizionariofriulano.it il Dizionari storic furlan, repertori lessicâl e onomastic dal furlan de tarde Ete di mieç, che al cjape dentri lis atestazions dal furlan des origjinis fin ae fin dal secul XV e si fonde sul scandai e la lematizazion des grandis fonts di documents, massime di ûs pratic, conservadis tai archivis e tes bibliotechis de regjon. Cu lis funzions de ricercje libare e avanzade, cui che al jentre tal sît al pues vê informazions sui lemis cjapâts dentri dal repertori, sui documents e la bibliografie specifiche che e je stade consultade.

La publicazion in rêt dal Dizionari e je promovude dal Dipartiment di Lenghis e Leteraturis gjermanichis e romancis dal Centri interdipartimentâl di ricercje su la culture e la lenghe dal Friûl (CIRF) de Universitât dal Friûl. Cu la poie de Societât Filologjiche Furlane, de Biblioteche Civiche di Udin e de Agjenzie Regjonâl pe Lenghe Furlane (ARLeF).