Ai 28 di Novembar dal 1998 al murive a Gurize Celso Macor, inteletuâl, alpinist, gjornalist, scritôr e poete nassût a Vierse di Romans dal Lusinç ai 4 di Avost dal 1925.
Tal doman de sô muart, sui mûrs de citât cualchidun al picjà un manifest scrit par talian, furlan e sloven che al meteve in lûs e al onorave il significât de sô opare e il rûl che Macor al veve vût intal panorame culturâl dal Gurizan: «Furlan, amant di dutis lis culturis».
La iniziative, che e vignive di bande di cualchi associazion locâl, e jere dal dut coerente cul orientament inteletuâl di un om che al veve cjatât doi dai ponts fondamentâi de sô azion intal dialic e intal confront continui cun chei altris.
Vinars ai 29 di Novembar aes 8 e mieze di sere tal Centri Civic di Lucinîs e vignarà presentade la gnove edizion cuadrilengâl – par furlan, sloven, talian e todesc – de racuelte di poesiis Impiâ Peraulis di Celso Macor, par cure di Renate Lunzer (Universität Wien) e Gabriele Zanello (Universitât dal Friûl).
La presentazion si inserìs intal progjet Incuintri di culturis: Nature cence confins, il festival transfrontalîr inmaneât des associazions Zveza kulturnih društev Nova Gorica e Porte a Nordest, li che e jentre ancje la Societât Filologjiche Furlane e che al à par obietîf chel di sensibilizâ la int su lis cuistions ecologjichis a traviers di oparis leterariis e esibizions artistichis, cjapant dentri autôrs dal passât e dal presint.
A intervegnin i curadôrs Renate Lunzer e Gabriele Zanello, compagnament musicâl di Giampaolo Mrach a la armoniche, leturis di Giorgio Monte e Marco Fior.
La jentrade e je libare e vierte a ducj.