La Costituzion de Republiche Taliane

Inte zornade de Fieste de Republiche, la consegne ai Prefets de nestre regjon

Lunis ai 2 di Jugn dal 2008, inte dì de Fieste de Republiche, la Societât Filologjiche Furlane e à presentât in maniere uficiâl la edizion in lenghe furlane de nestre Costituzion, la Costituzion de Republiche Taliane, cu la consegne di une copie a ognidun dai cuatri prefets de nestre Regjon Giovanni Balsamo (Triest), Ivo Salemme (Udin), Elio Maria Landolfi (Pordenon) e Roberto De Lorenzo (Gurize).

Il nestri Sodalizi al à sielt di celebrâ i 60 agns de promulgazion de Cjarte fondamentâl dal Stât rincurant la version in lenghe furlane, propit in linie cul spirt dai paris de Costituzion. La iniziative e à otignût l’Alt Patronât dal President de Republiche Giorgio Napolitano che, intune comunicazion, al à pandût il so «vivo apprezzamento per l'attività della Società Filologica Friulana che da anni si occupa della valorizzazione e della tutela della lingua e della cultura friulana, così come sancito dall'articolo 6 della nostra Costituzione».

Par chest, consegnant la copie de Costituzion de Republiche Taliane ai Prefets des cuatri provinciis dal Friûl Vignesie Julie, in cualitât di rapresentants dal Stât talian, si è volût consegnâle in maniere ideâl a ducj i citadins e l’aniversari de nassite de Republiche e je stade la ocasion plui juste.

Il President de Filologjiche Lorenzo Pelizzo e i siei rapresentants a àn consegnade la Costituzion tal cors di une cerimonie uficiâl che si tignarà in ognidune des cuatri sedis de Prefeture Triest, Udin, Gurize e Pordenon.