Pal "Dantedì", la zornade nazionâl par Dante Alighieri, la Societât Filologjiche Furlane us propon la vision de leture di "La Vite gnove" voltade par furlan di Aurelio Venuti.
Une leture ch'e je stade fate in Setembar dal an passât te cort di Palaç Mantica, tai sietcent agns de muart dal grant poete toscan e inte suaze de rassegne UdinEstate, in colaborazion cu Teatri Stabil Furlan.
Cun Matteo Venier e i atôrs Manuel Buttus, Paolo Mutti, Marta Riservato.
Regjie di Carlotta Del Bianco.
L'incuintri si pues tornâ a viodilu in cheste pagjine, fracant su la freçute
La Vita nova e je un libello che Dante al à componût subite dopo la muart di Beatrice (1290), metint adun tocs di prose e poesiis, daûr l'esempli dai prosimetris de ete di mieç. Il librut si divît in 42 cjapitui e al conten 31 lirichis, tiradis fûr de produzion dal autôr di zovin. I pas di prose a àn sedi la funzion narative di contâ i moments plui impuartants de vicende amorose che e leave Dante a Beatrice, sedi la funzion di coment e di spiegazion des poesiis, daûr il model de razo dai trovadôrs provenzâi. Ta cheste opare Dante al rielabore in mût une vore origjnâl e personâl esperiencis de culture dal so timp.
(test gjavât de Jentrade)