Societât Filologjiche Furlane

Cul patrocini di: Provincie di Gurize, Provincie di Pordenon, Provincie di Udin, Ufici Scolastic Regjonâl

Lenghis 2011

Avîs di concors par traduzions des lenghis europeanis in furlan

Prime edizion

La Societât Filologjiche Furlane e inmanee la prime edizion dal Concors di traduzion des lenghis europeanis in furlan, risiervât a ducj i arlêfs des scuelis superiôrs dal Friûl.

Si à di voltâ in furlan un test di autôr di chês altris lenghis che si fevelin in Friûl Vignesie Julie (todesc e sloven) e de lenghe inglese.

Par ogni lenghe a son previodudis dôs sezions:

• une dedicade ai arlêfs dal bieni;
• une dedicade ai arlêfs dal trieni.

Regolament

1. Il concors al è viert a ducj i arlêfs dai Istitûts di istruzion medie superiôr dal Friûl.
2. La partecipazion al concors e à di jessi personâl e no si acetin lavôrs di grup; si pues partecipâ cun plui lenghis, a condizion di rispietâ la categorie di apartignince (bieni-prins doi agns opûr trieni-ultins trê agns di scuele).
3. I tescj di voltâ si cjatin li des segretariis des scuelis, li des sedis de Societât Filologjiche Furlane, o ancje tal sît internet www.filologicafriulana.it.
4. I lavôrs a varan di jessi presentâts in forme anonime, dentri di une buste cuntun sproc, che al varà di jessi tornât a scrivi ancje intune seconde buste sierade (e metude dentri de prime), cun dutis lis informazions personâls dal concorint (date e lûc di nassite, direzion di residence, numar di telefon, direzion di pueste eletroniche, scuele e classe frecuentade). Cui che nol rispiete chestis regulis al vignarà daurman scualificât. 
5. I lavôrs si à di mandâju dentri dai 30 di Avrîl dal 2011 a cheste direzion: Societât Filologjiche Furlane "Graziadio Isaia Ascoli", vie Manin 18, 33100 Udin. Su la buste e va ripuartade cheste indicazion: Lenghis 2011  - Concors di traduzion des lenghis europeanis in furlan.
6. Pe traduzion si à di doprâ la koiné uficiâl de lenghe furlane, o ben ancje une varietât locâl dal furlan, a condizion di declarâle tal sfuei li che e je la traduzion.
7. I criteris di valutazion a son, dongje de ricjece e de coretece de lenghe furlane, ancje la cualitât de traduzion e la atenzion lenghistiche e gramaticâl rispiet al test origjinâl: la traduzion par furlan no à di jessi, in sostance, une traduzion dal talian.
8. La Jurie, fate di esperts di furlan nomenâts de Societât Filologjiche Furlane, e proclamarà i vincidôrs a so judizi. Il judizi de Jurie al è insindacabil. Si proclamarà un vincidôr par ogni categorie e par ogni lenghe: salacor la Jurie e segnalarà fin a doi lavôrs par ogni categorie. I vincidôrs e i segnalâts par ogni sezion a varan in premi bogns di libris editâts de Societât Filologjiche Furlane par un valôr di: vincidôr 250,00 euros; segnalât 100,00 euros.  
9. I miôr tescj a podaran jessi publicâts tes rivistis o tes publicazions de Societât Filologjiche Furlane.
10. I nons dai arlêfs vincidôrs e dai segnalâts, insiemit cu la indicazion dal lûc, de ore e de zornade de cerimonie di premiazion, a saran comunicâts par cure de Societât Filologjiche Furlane diretementri aes segretariis des scuelis e ai interessâts.
11. Par altris informazions si pues clamâ la Societât Filologjiche Furlane (tel. 0432 501598, interni 3, direzion eletroniche: formazione@filologicafriulana.it).

Culì, si puedin discjariâ i tescj di voltâ:

 Traduzion dal inglês in furlan - Sezion Bieni

 Traduzion dal inglês in furlan - Sezion Trieni

 Traduzion dal todesc in furlan - Sezion Bieni

 Traduzion dal todesc in furlan - Sezion Trieni

 Traduzion dal sloven in furlan - Sezion Bieni

 Traduzion dal sloven in furlan - Sezion Trieni