Leture continue de Bibie par furlan, si cirin letôrs volontaris
Udin, Glesie de Puritât, 3 - 9 di Avrîl dal 2011
Si cirin letôrs volontaris pal progjet di leture integrâl, continue e par furlan de Bibie de Gjenesi fin ae Apocalìs, che si tignarà a Udin te Glesie de Puritât cun domenie ai 3 fin a sabide ai 9 di Avrîl 2011, par par 140 oris in dut, ven a stâi siet dîs e sîs gnots.
Il progjet al è promovût de ARLeF - Agjenzie Regjonâl pe Lenghe Furlane, de Arcidiocesi di Udin, de Associazion culturâl Glesie Furlane e de Provincie di Udin. A poin la iniziative la Arcidiocesi di Gurize, la Diocesi di Concuardie-Pordenone e lis Provinciis di Gurize e di Pordenon.
La leture par furlan e je pensade in onôr da la tradizion da la Glesie di Aquilee: di fat e met dongje lis lidrîs linguistichis, religjosis e culturâls dal teritori furlan. L’event al è unic tal gjenar, stant che pe prime volte il Test Sacri al vignarà let par intîr intune lenghe minoritarie.
E je tacade la ricercje dai volontaris, a ’nt conventin
1300; la leture e durarà dai 3 ai 10 minûts, daûr dal test sielt o destinât. Cui che al vûl ufrîsi al podarà notâsi, di bessôl o cuntun grup di letôrs, clamant il numar
0432-555979 dal lunis al vinars (la matine da lis 10 a la une e dopodimisdì da lis 5 a lis 8), o pûr scrivint a la direzion
bibie@regione.fvg.it.