In chest 2021 la Societât Filologjiche Furlane e ricuarde un grant om de sô storie, il dotôr Luigi Ciceri (Tresesin, 1911-1981), muart ai 17 di Lui za fa 40 agns.
Laureât in Medisine e Chirurgjie, al veve metût sù il repart stomatologjic dal Ospedâl Civîl di Udin, là che al è stât primari fin a la pension.
La sô passion pe leterature e jere scomençade intant dai studis al liceu, cuant che si veve interessât a la figure di Ippolito Nievo e i veve dedicât studis e une mostre (1961).
Daspò de Seconde Vuere Mondiâl e jere nassude la sô amicizie cun Pier Paolo Pasolini (al veve publicât a spesis sôs il volumut ”Tal cour di un frut”).
Dilunc de sô vite Ciceri al à prudelât cence padin la identitât furlane, al è stât cultôr de storie e des tradizions di chenti cu la passion - insieme cu la sô femine Andreina Nicoloso - di tirâ dongje testemoneancis par documentâ la specialitât de tiere e de int furlane.
Inte Societât Filologjiche Furlane al à tornât a meti in pîts la biblioteche e al à dât un sburt al setôr editoriâl cu la publicazion di gnûfs volums: al à inviât lis ”golainis” dai numar unics anuâi, dai ex voto, des contis popolârs e des zontis al Pirona. Al è stât diretôr dai periodics «Sot la Nape» e «Strolic furlan» e colaboratôr dal «Ce fastu?». Il so contribût al è stât determinant co si comprà tant che sede de Societât il palaç Mantica di vie Manin a Udin.
Insiemi cu la sô femine Andreina al è stât un grant studiôs di tradizions popolârs, etnologjie, arts aplicadis e critiche leterarie. A lôr ur è intitulât il Premi Ciceri che ogni doi agns al premie studis su apiets de culture e dal teritori dal Friûl e che chest an al è rivât a la edizion numar XX. Lis voris a àn di rivâ dentri dai 20 di Avost; il bant si lu cjate tal link in cheste pagjine.