«Un fantat du stîl classic inglês», lu piturà Lelo Cjanton.
Manlio Michelutti al nassè a Vît, te Val Arzin, ai 12 di Mai dal 1933, ma al à vivût dibot simpri a Udin, li che al à insegnât Letaris tes scuelis superiôrs, lavorant ancje pal Proveditorât e pe Universitât.
Om di grande sensibilitât pe culture umanistiche e espert di lenghe e di tradizions popolârs, viers il 1980 al scomençà a colaborâ ancje cu la Filologjiche, prin pe preparazion de mostre de civiltât furlane a Vile Manin, e po fasint di segretari, di vicepresident pal Friûl di Mieç e di president (dal 1994 al 2001).
Il so lavôr pe Filologjiche, puartât indenant simpri cun biel trat, disponibilitât e esperience, al è stât fondamentâl par rinovâ la Societât e par vierzile no nome a chês altris istituzions culturâls furlanis, ma ancje a la zoventût e a l’Europe.
Al è stât redatôr di «Sot la nape» e diretôr dal «Strolic furlan», e par prionte al à dadis dongje cun competence diviersis publicazions di pês. Biel che lui jere president, pe prime volte il congrès de Filologjiche al è stât puartât tal forest (a Klagenfurt, dal 2000).
Al è mancjât ai 10 di Fevrâr dal 2001.