Stant che no si pues incuintrâsi, come ogni unvier, tal calôr uman e sociâl da la vecje stale coloniche a Vilecjaze di Listize, chest an pe tradizionâl rassegne In File i Colonos a àn volût sperimentâ une schirie di conferencis ch’a van in onde su Telefriuli.
Il secont apontament al è par domenie ai 28 di Fevrâr a lis 19.15 su Telefriuli, cjapant pît di une des ultimis publicazions de Societât Filologjiche Furlane:
Marc d'Europe - Il romanç par furlan di Carlo Sgorlon. Tra Friûl, Europe e Islam
Conference di Anna Bogaro, intervent dal tradutôr Eddi Bortolussi, leturis di Fabiano Fantini, musichis di Riccardo Pes.
Forsit cuant che tal 1993 Carli Sgorlon al publicà “Marco d’Europa” al veve tal cjâf dute une altre idee: chê di scrivi un romanç storic “di servizi” – al disè lui stes – pai fraris capucins, che a volevin viodi beatificât un lôr confradi innomenât e plen di coragjo, e pai furlans, che come par solit a san pôc di se stes e dai fîs speciâi de lôr tiere mari. Subit daûr de publicazion dal test par talian, Eddi Bortolussi al le a cjatâ il scritôr e i domandà di podê voltâlu par furlan. Cumò, daspò passe dîs agns che Sgorlon al à lassât chest mont e che la traduzion prometude si è fate libri, tes mans o vin la storie di no crodi di pari Marc di Davian, taumaturc, conseîr strent di un imperadôr, predicjadôr straordenari che al savè sburtâ i soldâts che a fermarin i Turcs aes puartis di Viene tal 1683. Ma soredut nus ven cuntun sgrisul la sensazion che chest romanç al feveli ancje di nô, vuê, intun timp no mancul incuiet dal Sîscent di Marc d’Europe.
Il tierç e ultin apontament cun In File al sarà par domenie ai 7 di Març a lis 19.15 su Telefriuli:
Crudeliter ces fastu eructuant - La cuestion lenghistiche tal "De vulgari eloquentia" di Dante
Conference di Mario Turello, leturis di Fabiano Fantini, musichis di Riccardo Pes, traduzion furlane di Gottardo Mitri.