Incuintri promovût in colaborazion jenfri il Comun di Buie e la Societât Filologjiche Furlane te suaze des celebrazions pe Fieste de Patrie dal Friûl.
Cul intervent di Roberto Iacovissi.
Par memoreâ un dai plui innomenâts testemonis de storie di Buie, la Aministrazion comunâl, cul jutori de Arlef e cul lavôr de Societât Filologjiche Furlane, si propon di onorâ chest scrit di Bonsignôr Gian Carlo Menis su la vite di so pari Pieri, a cuarante agns de muart.
Figure fondamentâl dal nestri Nûfcent e testemoni di tantis pagjinis impuartantis de contemporaneitât di Buie, Pieri Menis, studiôs de storie e des tradizions locâls, e ancje autôr di oparis di croniche e di narative, al è stât un model di inteletuâl complet. Tai siei scrits al à volût contâ une societât che, ancje se segnade di une evoluzion centant svelte e tantis voltis vitime de dramaticitât dai siei timps, no podeve e no veve di dismenteâ secui di tradizions.