Za fa 150 agns, ai 17 di Zenâr dal 1872, al nasseve a Porpêt "Pre Zaneto”, pseudonim di Giovanni Schiff.
Al è stât plevan di Percût dal 1911 al 1947 e par scuasit mieç secul, cu lis sôs poesiis in rût furlan che a saltavin fûr ogni setemane, al à informât, metût in vuaite e straviât i letôrs dai gjornâi catolics furlans («La Nostra Bandiera», «Bandiera Bianca» e «La Vita Cattolica»).
Plui di doi mil componiments, indulà che il predi al mostre la sô sgrimie, cjaviestre e salde, che i fâs vuadagnâ l’afiet dai letôrs di dut il Friûl ma ancje dal forest. Intal 1933, dut câs, il regjim fassist, sustât pes stocadis che il plevan nol sparagnave cuintri dai sorestants, i ordenà di doprâ dome la lenghe taliane, metint a tasê chei viers furlans cence rispiet e soversîfs.