La Societât Filologjiche Furlane, che e da il patrocini a la iniziative, e ricuarde che dentri di miezegnot di lunis ai 20 Setembar dal 2021 a àn di rivâ lis voris de sezion dai curtmetraçs pe XLII edizion dal Premi San Simon, promovût da la citât di Codroip e intitulât a la memorie di Agnul Pittana.
I filmâts a varan di vê un svilup naratîf che si davuelç sul teme dal Quadrivium, toponim latin de Citât di Codroip che al vûl dî crosere di cuatri stradis. Duncje, il curtmetraç al varà di ispirâsi al teme de crosere/incuintri interpretât cun libertât in ducj i pussibii significâts.
I curtmetraçs – no plui luncs di 15 minûts – a varan di jessi inedits.
Lis scritis (titul dal film, titui di cjâf e di code) a varan di jessi par furlan e te grafie uficiâl, i dialics a varan di jessi almancul pal 50% in lenghe furlane e ce che al reste al podarà jessi in cualsisei lenghe uficiâl o minoritarie dal mont, ma cui sottitui par talian o par furlan.
Lis carateristichis tecnichis e i riferiments par mandâ lis voris si cjatilis tal bant di podê discjamâ te sezion download in cheste pagjine.