Sabide ai 7 di Dicembar dal 2019, tal Salon dal Parlament in Cjistiel a Udin, e je stade la cerimonie di consegne dal Premi Rusticitas 2019, istituît de Associazion pre Gilberto Pressacco e rivât ae X edizion. I ricognossiments a son stâts assegnâts al professôr Gian Paolo Gri, grant studiôs des tradizions popolârs, e ae nestre Societât Filologjiche Furlane tai cent agns di vite e di ativitât. Al president Federico Vicario i è stade consegnade une opare dal artist Lorenzo Vale; ae Societât Filologjiche une opare dal mestri Giorgio Celiberti.
In zonte la lectio magistralis dal president e la laudatio dal professôr Gianfanco Ellero.
Simpri sabide ai 7 di Dicembar, tal teatri de Cjase de Zoventût a San Scjefin di Buie, e je stade la cerimonie dal Premi "Nadâl Furlan", cul ricuart dal Centenari dal nestri Istitût. Inte ocasion, il President dal Circul Laurinzian di Buie, Vergilio Burello, al à consegnât tant che ricognossiment une ceramiche d'autôr al vicepresident Carlo Venuti.