La Societât Filologjiche Furlane e à puartât insom la digjitalizazion dai tescj cjapâts dentri te golaine di volums Racconti popolari friulani.
Ae fin dai agns Sessante dal secul passât, la Societât e veve inviât un progjet par tirâ dongje tescj di narative di tradizion orâl. La idee e jere stade di Luigi e Andreina Ciceri, che a cjatarin daurman la colaborazion di Renato e Elvia Appi. Tal cors dai agns si son dâts dongje ancje tancj altris colaboradôrs.
Chest corpus di liendis, flabis, nainis, contis sacris e profanis - racueltis e trascritis tes varietâts lenghistichis locâls - al rapresente un patrimoni fondamentâl par conservâ la storie e la memorie coletive dal popoul furlan e a vuê si pues consultâlu in maniere libare in rêt (viôt i link in cheste pagjine).
Il progjet al è realizât cu la poie de Fondazion Friuli.