Racuelte di firmis cuintri lis ofesis di Paolo Villaggio ai Furlans

In riferiment aes peraulis di ofese che il comic Paolo Villaggio al à dopradis viers Popul furlan tal so ultin libri "Mi dichi" (ed. Mondadori, 2011, pagj. 42), la Societât Filologjiche Furlane e domande a ducj socis, amîs e Furlans che si sintin ofindûts par chestis afermazions, di meti la proprie firme sul document che i permetarà ae Filologjiche di puartâ il siôr Villaggio denant dal judiç.

Si pues vignî a firmâ il document in dutis lis sedis de Filologjiche - a Udin, Gurize e Pordenon - tai oraris pal public o pûr si pues discjamâ e stampâ il sfuei in zonte chi sot, firmâlu e fâlu firmâ a amîs e parincj e po puartâlu a man o spedîlu ae nestre sede in vie Manin 18 - 33100 Udin.

O fasìn stât su la poie di ducj, sigûrs che i Furlans i saran dongje ae Filologjiche in cheste impuartante cuistion.