4 puescj in Filologjiche pai volontaris dal Servizi Civîl Nazionâl

Il TERMIN PE PRESENTAZION DES DOMANDIS AL E' FIN AES 

2 DI DOPOMISDI' DAI 20 DI AVRÎL DAL 2016

Il Dipartiment de Zoventût  e dal Servizi Civîl Nazionâl al à dât fûr l’avîs pe selezion di 120 volontaris di inviâ tai progjets di Servizi civîl te Regjon Friûl Vignesie Julie. Dentri de graduatorie fate buine de Regjon, a son ancje i progjets

• ProLenghe: promozione della lingua e della cultura friulane
  
• Biblioguide: promozione e supporto alle ricerche nella Biblioteca della Società Filologica Friulana
  

promovûts de Societât Filologjiche Furlane, che e met a disposizion 4 puescj.

A puedin partecipâ ae selezion i citadins europeans o citadins fûr de Comunitât Europeane ma in regule cul permès di permanence, cence distinzion di ses che, te date di presentazion de domande, a vedin disevot agns finîts e no plui di vincjevot. In particolâr, par partecipâ ae selezion in Filologjiche, si domandin almancul il diplome di scuele medie superiôr, la cognossince di une o plui lenghis europeanis, la cognossince de informatiche di base, buinis capacitâts di comunicazion. La sede dal servizi e sarà la Societât Filologjiche Furlane in vie Manin 18 a Udin.

Il servizi al durarà dodis mês e fin a 1.400 oris. I volontaris a àn dirit a un assegn di 433,80 Euro ogni mês.

La domande di partecipazion ae selezion, compagnade de fotocopie di un document di identitât valit e di une schede che e cjapi dentri i titui, e varà di jessi spedide o presentade diretementri ae Societât Filologjiche Furlane vie Manin, 18 – 33100 Udin dentri des 14.00 dai 20 di Avrîl dal 2016.

Al è pussibil presentâ dome une domade di partecipazion e par un progjet sôl di Servizi Civîl Nazionâl, sielzint tra chei che a son stâts metûts dentri tal bant nazionâl o tai bants regjonâls e des Provinciis autonomis, se no si ven lassâts fûr.

La domande e podarà jessi mandade:

- cu la pueste eletroniche certificade ae direzion sff@pec.filologicafriulana.it (si vise che al è pussibil mandâ un messaç a une direzion di pueste certificade dome di une altre direzion certificade, no cu la pueste ordenarie);

- cun racomandade A/R;

- a man.