La culture e je l’espression dal sigûr plui alte e fuarte de identitât di un popul, un’identitât che si ricognòs e che si misure te storie, tes tradizions, tal mût di resonâ, te vision dal mont e tal ponisi denant dal doman. Ta cheste prospetive la Setemane de culture furlane di chest an (dai 10 ai 20 di Mai dal 2018) e fronte il so percors di valorizazion e di promozion dal nestri jessi comunitât, presentant moments di memorie, di studi, di ricercje sul teritori e su lis personis che lu àn onorât cul lavôr, la passion, il lôr jessi furlans. E chest lu fasìn cul dâ continuitât a cheste manifestazion, la Setemane de culture furlane, une rassegne che di an in an e cres, par cualitât des propuestis e partecipazion. Gina Marpillero, Antonio Comelli, Alviero Negro, Alfeo Mizzau, Fabio Asquini, il Gard. Celso Costantini, Fermo Solari, Pierluigi Cappello e altris ancjemò a son lis personalitâts ch’o ricuardìn chest an, ma si ocupìn ancje de Universitât dal Friûl, pai cuarante agns de sô istituzion, dai cincuante agns des publicazions de riviste “La panarie”, dai cuarante agns di fondazion de benemerite associazion “La Bassa”.
Il nestri agrât, di cûr, ur va a ducj chei ch’a àn colaborât a meti adun une rassegne cussì interessant, plene di incuintris, iniziativis, visitis, manifestazions, presentazions e cunvignis, promovint la partecipazion cualifi cade di studiôs e ricercjadôrs, istituzions regjonâls e locâls, scuelis, associazions culturâls e prolocos. Un moment impuartant, la Setemane de culture furlane, par cognossi miôr il nestri Friûl, par confermâsi te nestre identitât.
Federico Vicario
President de Societât Filologjiche Furlane
Chi sot su pues discjamâ il program de
Setemane de culture furlane 2018.
Par informazions cjalâ il sît
www.setemane.it