Stâts gjenerâi des Lenghis minoritariis dal Friûl Vignesie Julie

Udin, Auditorium de Regjon (vie Sabbadini, 31)

Miercus ai 23 di Fevrâr 2011, aes cuatri daspomisdì

Lis lenghis minoritariis, tai ultins agns, a àn cuistât une part impuartante, fintremai fondamentâl, tal peâ i cambiaments no di pôc sucedûts te nestre societât: la incressite de Europe di 15 a 27 Stâts components e, intune, il sfantâsi dai confins, une Europe fate di cetancj popui e culturis, programs europeans a pro de coesion dal teritori, ativitâts e patrimonis culturâi tignûts no tant come causis di spese, si ben tant che oportunitâts di investiment par incressi e insiorâ la cualitât de vite.

Ta cheste suaze, l'Assessorât regjonâl ae culture, sport, relazions internazionâls e comunitariis al da dongje la 2e Conference regjonâl su la Lenghe Furlane che si davuelzarà te seconde metât dal mês di Jugn, dividude in trê moments. Par slargjâ la partecipazion a chest event e definîlu miôr al è impuartant scoltâ la vôs di feminis e oms che, par un cont o par chel altri, a spindin inteligjence, passion, mistîr e timp a pro de lenghe furlane.

I Stâts Gjenerâi de Lenghe furlane si tignaran miercus ai 23 di Fevrâr dal 2011 aes cuatri daspomisdì a Udin li dal Auditorium de Regjon in vie Sabbadini, 31, par "scoltâ il teritori", no par dâ parès gjenerics ma par fâ propuestis sul concret, meti in lûs fastidis o ben câs di cualitât che a risultin de Vuestre esperience. Intant dal incuintri a vignaran regjistrâts o ben tirâts dongje ducj i intervents e lis segnalazions di 3/5 minûts, ancje chei che o scrivarês o pûr o spessearês a mandâ vie prin par pueste eletroniche, doprant la direzion lingueminoritarie@regione.fvg.it. I vuestris contribûts a saran studiâts e profondîts cul fin di butâ jù il program de 2e Conference Regjonâl de Lenghe Furlane in Friûl Vignesie Julie.