Puedial un dissen animât contâ une tragjedie? Isal pussibil pandi midiant di un fumet la storie di un disastri par colpe dal om? La rispueste si clame Ti conti il Vaiont, la animazion di une graphic novel realizade de Societât Filologjiche Furlane par contâ ai plui zovins ce che al è sucedût ai 9 di Otubar dal 1963, cuant che la mont Toc e je vignude jù causant une ondade di passe 250 metris che e à sdrumât i paîs di Nert, Cas, Longaron e almancul altris cinc frazions cun cuasi 2000 muarts.
Cuntun lengaç adat par fruts, zovins e grancj, i dissens dal fumetist Paolo Cossi nus menin ae scuvierte des causis e des conseguencis di chê che e je stade une des plui grandis disgraciis de seconde metât dal Nûfcent.
Par memoreâ chescj fats, za cualchi an indaûr la Filologjiche e veve inviât un progjet didatic pes scuelis e cumò, partint propit di chel progjet, e à fat ancjemò un pas indenant cu la animazion dal fumet, che al veve vût za tant sucès come libri a stampe.
In ocasion dal sessantesim inovâl de tragjedie, ai 3 di Otubar tor des nûf e mieze di sere, su RAI 3 bis - canâl 108 - si podarà viodi pe prime volte chest fumet animât te version in lenghe furlane. Tai prossims mês al sarà metût in onde ancje il dissen animât par talian, simpri di bande de sede regjonâl de RAI pal Friûl Vignesie Julie.
Tes stessis zornadis il Docuscuele, Centri Regjonâl di documentazion pe scuele furlane de Filologjiche, al promovarà la proiezion dal filmât pai students des scuelis di dut il Friûl.