O’ sarìn “popul” se o’ sarìn unîz. Al sarà Friûl se o’ varìn un sol cûr.
Forsit nome chestis peraulis a rivin a dî in struc la vite e il pinsîr di Tiziano Tessitori, un dai paris de nestre regjon, president de Filologjiche dal 1954 al 1963.
Nassût a Sedean ai 13 di Zenâr dal 1895, al studià in seminari e po si laureà in Leç a Urbin. Passade la prime vuere, si impegnà tal Partît Popolâr, cirint di lâur incuintri massime ai contadins e a la int plui puare, ma tai agns dal fassisim al podè puartâ indenant nome il so lavôr di avocat penalist.
Om di fede profonde e vive, ancje tai moments plui dûrs de ditature al cirì di promovi un pinsîr libar e dinamic, massime te Azion Catoliche e te Scuele catoliche di culture.
La sô figure di om politic e deventà centrâl tal doman de Liberazion: tal Lui dal 1945 al fondà la Associazion pe autonomie furlane, e sicu pari costituent al rivà a otignî la istituzion de regjon autonome Friûl - Vignesie Julie, che nome dal 1963 e podè vê il so statût speciâl.
Al murì a Udin ai 19 di Avrîl dal 1973, daspò di jessi stât senatôr in cinc legjislaturis, sotsegretari al Tesaur e ministri de riforme burocratiche.