La Societât Filologjiche Furlane, che e à dât il patrocini, e segnale il concors leterari in lenghe furlane

Vôs de Basse

II edizion

Une iniziative dai Comuns di Cjarlins, Gonârs, Muçane, Porpêt, Prissinins e San Zorç di Noiâr, cul patrocini de Societât Filologjiche Furlane, de Cooperative Informazion Furlane e de sezion di San Zorç di Noiâr de Universitât de Tierce Etât “Paolo Naliato”.

La idee di fonde e je chê di stiçâ la produzion scrite in lenghe furlane, ricuardant tal stes timp i autôrs che a àn insiorât il panorame culturâl de Basse Furlane: Pre Zaneto, Tite Marzuttini, Gina Marpillero, Luciano Morandini, Pierluigi Visintin.

Il concors al è dividût in trê sezions, lis primis dôs risiervadis ai grancj (Narative e Poesie), e la tierce pai arlêfs des scuelis superiôrs di prin e secont grât.

Par partecipâ te sezion "Narative" si domande di mandâ une conte curte (a teme libar), un curt teatrâl  o la traduzion in lenghe furlane di un test curt in lenghe taliane , di cualsisei gjenar. La sezion "Poesie" e je par poesiis in lenghe furlane o traduzions di poesiis in altris lenghis. E je ancje une sezion pai students, che a puedin partecipâ o come singui arlêfs o tant che grup di classe, cuntune conte curte o une poesie. 

I lavôrs a àn di rivâ, in buste sierade o a man, al Ufici Protocol dal Comun di San Zorç di Noiâr, Place dal Municipi 1, 33058 San Zorç di Noiâr (Udin), dentri di misdì e mieç di vinars ai 28 di Dicembar dal 2018.

Achì sot si pues dicjamâ il regolament par intîr.