L'an dal Centenari si è viert ai 16 di Lui dal 2019 cu la scree di Cjasa Ascoli a Gurize, in onôr dal pari dai studis di lenghistiche che la Societât i è intitulade, ma ancje la ocasion par confermâ la presince de Filologjiche tal Friûl di soreli jevât.
A Udin si è davuelte la cunvigne "Istituti culturali, storia e comunità" (Salon dal Parlament in Cjistiel, ai 5 di Otubar) e, dongje, l'anuâl Congrès sociâl (Centri culturâl des Graciis, ai 6 di Otubar).
In ocasion dal congrès al è stât ancje presentât il numar unic "Friûl" in doi volums par cure di Andrea Tilatti, che al conte di un secul di storie de Filologjiche e di culture in Friûl. Il volum al è stât presentât in plui ocasions e ancje a Rome, te sede di rapresentance de regjon Friûl Vignesie Julie, a Milan tal convent dai Paris Servîts e a Viene, te sede dal Istitût talian di Culture.
Dai 7 ai 9 di Novembar jenfri Gurize e il cjistiel di Clomberc si è davuelte la tierce cunvigne di toponomastiche furlane, sot dal titul "Cent’anni di studi dei nomi di luogo".
Il teatri Verdi di Gurize e il teatri Candoni di Tumieç a àn dât acet al conciert dal Centenari, cu la partecipazion de orchestre sinfoniche e de corâl dal Conservatori “Jacopo Tomadini” di Udin, che a àn presentât musichis di autôrs furlans ineditis o pôc cognossudis.
La zornade dal Centenari, ai 23 di Novembar, e je stade ospitade a Gurize, la citât di fondazion: il program si è viert cuntun incuintri pai students su la impuartance dal plurilenghisim a Gurize; tal daspomisdì, te sede de Scuele di danze “Tersicore” in vie Crispi (te sale li che tal 1919 si dave dongje il Consei comunâl e li che e je nassude la Filologjiche) si è davuelte la cerimonie uficiâl in memorie de fondazion. La zornade si è sierade al Kinemax cu la proiezion in anteprime dal film documentari "L’Atlante della Memoria", ispirât ae vite di Ugo Pellis e a la imprese dal Atlant Lenghistic Talian (ALI), pe regjie di Dorino Minigutti.
Dal Centenari a fevelin doi numars des rivistis sociâls, «Sot la Nape» nr. 3-4 (2019) e «Ce fastu?» nr. 1-2 (2019).