Dal 2014 la Societât Filologjiche Furlane e inmanee, tal mês di Mai, la Setemane de culture furlane / Settimana della cultura friulana, une rassegne di events e manifestazions par promovi il patrimoni storic, lenghistic e artistic dal nestri Friûl.
Cheste iniziative e interesse, cun nô, cetantis realtâts associativis de regjon, istitûts privâts e prolocos, ma ancje ents publics e bibliotechis, comuns e Universitât, une iniziative che si propon ancje, se no soredut, di favorî la creazion di une rêt, fuarte e stabil, dai sogjets che si ocupin di culture furlane. Si trate di un percors di cressite par ducj, par dâ une salde prospetive ai studis furlans e une gnove dimension, plui fuarte, ae cussience de nestre identitât.
La rassegne, di an in an, e cjate il patrocini dal Ministeri de Culture, de Associazion des istituzions di culture talianis (AICI), ch'o rapresentìn in Friûl, de Regjon autonome e dal Consei regjonâl, di Promoturismo FVG, de Fondazion Friûl e de Fondazion CARIGO, di desenis e desenis di comuns furlans.
A colaborin cu la Setemane de culture ancje l'Ent Friûl tal Mont, par dâ il segnâl di une comunitât furlane cence cunfins, l'Ufici scuelastic regjonâl, l'Agjenzie regjonâl pe lenghe furlane (ARLeF), il Comitât regjonâl des prolocos (UNPLI), l'Associazion dai comuns talians (ANCI) e altris ancjemò.
Dut il mont de culture furlane, tal cors de Setemane, si da dongje par testemoneâ atenzion e considerazion pai aspiets plui diviers de furlanetât, tra storie e lenghe, musiche e art, economie e ambient, tradizion e modernitât, memoreant lis personalitâts dal nestri passât, plui o mancul vicin, ch'a àn lavorât a pro dal Friûl e che nus àn lassât il patrimoni di identitât che, in maniere cussì particolâr, nus rint ce ch'o sin.
La edizion 2025 si davuezarà dai 8 ai 18 di Mai. Lis propuestis di events si cjapin sù dentri dai 15 di Març a mieç de schede che si pues discjamâ in cheste pagjine a la vôs download.